अमेरिकी राष्ट्रपति जो बाइडेनले सोमबार सैनिक कू भएको म्यानमारमाथि फेरि प्रतिबन्ध लगाउने चेतावनी दिएका छन्।

म्यानमारको सेनाले नागरिक सरकारलाई अपदस्त गरेर राष्ट्रपतिसहित नेताहरूलाई नियन्त्रण लिएपछि राष्ट्रपति बाइडेनले यसअघि हटाइएका प्रतिबन्धहरू फेरि लगाउने चेतावनी दिएका हुन्।

सैनिक कूको भत्सर्ना गर्दै बाइडेन नोबेल शान्ति पुरस्कार विजेता आङ सान सुकीसहितका नेताहरूलाई पक्राउ गर्नु म्यानमारको प्रजातान्त्रिक रूपान्तरण र कानुनको शासनमाथिको प्रहार भएको बताएका छन्।

उनले सैनिक कूको विरोध गर्न र नेतृ सुकीसहित हिरासतमा रहेका नेताहरूको रिहाइका लागि दबाब दिन अन्तर्राष्ट्रिय समुदायलाई आग्रह पनि गरेका छन्।

१२ दिनअघि अमेरिकाको राष्ट्रपति बनेका बाइडेनका लागि मित्र राष्ट्रहरूलाई एकसाथ लिएर अघि बढ्नु पर्ने चुनौती भएको यो पहिलो अन्तर्राष्ट्रिय घटना हो।

‘म्यानमारको सैनिकलाई शक्ति तुरून्त फिर्ता गर्न र नेताहरूलाई तुरून्त रिहाइ गर्न दबाब दिन अन्तर्राष्ट्रिय समुदायले एउटै स्वर बनाउनु आवश्यक छ,’ बाइडेनको विज्ञप्तिमा भनिएको छ,‘गएको दशकमा म्यानमारको प्रजातान्त्रिक प्रणालीतर्फको प्रगति हेरेर अमेरिकाले प्रतिबन्ध हटाएको थियो। तर ती प्रगतिमा प्रतिगमन भएपछि प्रतिबन्धको नीतिमा आवश्यक कदमसहित तत्काल पुनर्विचार गर्नुपर्ने अवस्था आएको छ।’

बाइडेनले म्यानमारको सैनिकलाई टेलिफोन र इन्टरनेटमा लगाइएको प्रतिबन्ध तत्काल हटाउन भनेका पनि भनेका छन्।

उनले यो कठिन घडीमा को म्यानमारका नागरिकका पक्षमा उभिएका छन् भन्ने पनि आफूले हेरिरहेको बताएका छन्।

हामी उक्त क्षेत्र र संसारभरिका सहयात्रीसँग म्यानमारमा प्रजातन्त्र र कानुनको शासन पुनर्स्थापना गर्न काम गर्नेछौं र बर्माको प्रजातान्त्रिक प्रणालीलाई अवरोध गर्न खोज्नेहरूलाई पनि जिम्मेवार बनाउने छौं,’ बाइडेनको विज्ञप्तिमा भनिएको छ।

यसैबीच म्यानमारमा विकसित पछिल्लो राजनीतिक घटनाक्रमबारे छलफल गर्न संयुक्त राष्ट्र संघको सुरक्षा परिषदको बैठक मंगलबार बस्दैछ। सुरक्षा परिषद् सदस्य रहेको चीनले यो घटनामा कस्तो प्रतिक्रिया दिन्छ भन्नेमा धेरैलाई चासो छ।