एजेन्सी – भारतले कोरोनाभाइरस विरुद्धको खोप यही शनिबारदेखि आम सर्वसाधारणलाई दिन सुरु गर्ने भएको छ। सुरक्षा चिन्ता, कमजोर पूर्वाधार र आम जनतामा रहेको सन्देहबीच झण्डै एक अर्ब ३० करोड जनतालाई खोप दिने कार्य भारतका लागि निकै जटिल हुनेछ।
त्यहीकारण पहिलो प्राथमिकतामा राखेर सरकारले आउँदो असारसम्ममा करिब ३० करोड मानिसलाई खोप दिने तयारी गरेको छ। भारत विश्वमै चीनपछि सबैभन्दा बढी जनसंख्या भएको दोस्रो मुलुक हो।
खोपका लागि ७०० जिल्लामा करिब एक लाख ५० हजार कर्मचारी परिचालन गरिएको छ। उनीहरूले तालिम समेतका आवश्यक जानकारी दिइएको छ। भारतले आपतकालीन प्रयोगका लागि भन्दै पहिलो चरणमा तीन करोड स्वास्थ्यकर्मी तथा ५० वर्ष वा सोभन्दा बढी उमेरका व्यक्ति तथा स्वास्थ्य जोखिममा रहेका २७ करोड व्यक्तिलाई खोप दिने तयारी गरेको छ।
अधिकारीहरूले पोलियो र अर्बुद रोगसम्बन्धी बालबालिकालाई नियमित खोप दिइरहेकाले कोभिड–१९ विरुद्धको खोप लगाउन त्यति समस्या नहुने बताएका छन्।राष्ट्रिय खोप इन्स्टिच्यूटका सत्यजित राठले बालबालिकालाई खोप लगाउनुभन्दा कोभिड–१९ विरुद्धको खोप लगाउनु निकै जटिल र चुनौतीपूर्ण रहेको बताए।
भारतले प्रयोगमा ल्याउन लागेका खोपहरूमा अस्ट्राजेनिकाले स्थानीय साझेदारी सेरम इन्स्टिच्युटसँग मिलेर तयार पारेको कोभिसिल्ड र भारत बायोटेकले विकास गरेको कोभ्याक्सिन रहेका छन्। यी दुवै खोपलाई चिसो ठाउँमा राख्नुपर्ने हुन्छ।
सरकारले २९ हजार चिस्यान केन्द्र, २४० वटा कुलर, ७० वटा फ्रिजर, ४५ हजार रेफ्रिजेरेटर, ४१ हजार डिपफ्रिज र ३०० वटा सोलार रेफ्रिजेरेटरको व्यवस्था गरेको छ। कोरोनाभाइरसको संक्रमणबाट एक लाख ५० हजारभन्दा बढी व्यक्तिको ज्यान गइसकेको छ। कोरोना भाइरसका कारण भारत विश्वमै आर्थिक रूपमा सबैभन्दा बढी प्रभावित भएको छ, र लाखौं मानिसले आफ्नो रोजगारी गुमाएका छन्।
हालै भारतका १८ हजार मानिसमा गरिएको सर्वेक्षणमा झण्डै ६९ प्रतिशतले कोभिड–१९ को खोप लिन आफूलाई हतार नभएको बताएका थिए। सेरम इन्स्टिच्यूटले भारतमा आफूले उत्पादन गरेको खोप व्यक्ति र संस्थालाई पनि बेच्ने गरी अनुमति पाएको छ। सेरमको खोपको मूल्य भारतमा भारु एकहजार तोकिएको छ।