काठमाडौं – भारतीय भारतीय क्रिकेट बोर्डका अध्यक्ष सौरभ गाङ्गुलीको मुटुको शल्यक्रिया गरिएको छ।

गाङ्गुलीलाई शनिबार बिहान व्यायाम गर्ने क्रममा हृदयाघात भएपछि पश्चिम बंगालको वुडल्याण्ड अस्पतालमा भर्ना गरिएको थियो। ‘सौरभ गाङ्गुलीको एन्जियोप्लास्टी भएको छ र उहाँको स्वास्थ्य अवस्था स्थिर रहेको छ,’ गाङ्गुलीको उपचारमा संलग्न चिकित्सक सरोज मण्डलले अस्पताल बताएका छन्।

गाङ्गुली विरामी भएको खबरपछि उनलाई उपचारका लागि भर्ना गरिएको वुडल्याण्ड अस्पतालमा क्रिकेटका पूर्व कप्तानका आफन्त तथा सुभेच्छुक अस्पताल परिसरमा जम्मा हुँदा ठूलो भीड लागेको छ।

भारतीय क्रिकेट कन्ट्रोल बोर्ड (बीसीसीआई) का सचिव जय शाहले गांगुलीको परिवारलाई उद्धृत गर्दै भने, ‘मैले गाङ्गुलीको परिवारसँग कुराकानीका क्रममा पारिवारिक एक सदस्यले उहाँको अवस्था स्थिर रहेको र उपचारमा राम्रो प्रतिक्रिया मिलिरहेको जानकारी पाएको छु।’

गाङ्गुली सन् २०१९ मा सर्वसम्मतरूपमा बीसीसीआईको अध्यक्ष निर्वाचित भएका थिए। सफल खेलाडीको रूपमा उनले लामो समय भारतीय क्रिकेटको नेतृत्व गरेका थिए।