सुर्खेत – सोमबार साँझ ८:१५ बजेदेखि आज (मंगलवार) साँझ ७ बजेसम्म जारी कर्फ्यु हटेको छ। जिल्ला प्रशासन कार्यालय सुर्खेतका अनुसार जारी कर्फ्यु साँझ ७ बजेबाट हटाइएको हो । यस्तै, वीरेन्द्रनगरका मुख्य तीन स्थानलाई भने कर्फ्यु हटेपनि निषेधित क्षेत्र कायम गरिएको प्रशासनले जनाएको छ ।
सोमबार बन्दकर्ताले सबै भन्दा बढी उग्ररुप देखाएका मगलगढी र यरीचोक सँगै विभिन्न राजनीति दलका पार्टी कार्यालय रहेको हटियालाइनमा निषेधित क्षेत्र कायम गरिएको प्रशासनले जनाएको छ।
प्रजिअ खगेन्द्रप्रसाद रिजालले दिनभरीको अवस्था हेर्दा कुनै अप्रिय घटना नभएको देखिँदा सोमबार राती सवा ८ बजेबाट जारी कर्फ्यु ७ बजेबाट हटाइएको जानकारी दिए ।
प्रशासनले निषेधाज्ञा तोकिएका क्षेत्रमा पाँच जनाभन्दा बढी जम्मा हुन नदिने गरी आज साँझ ७ बजेबाट अर्को आदेश नहुञ्जेलसम्मका लागि जारी रहने जनाएको छ ।
