काठमाडौं – बौद्धस्थित एक रेस्टुरेन्टमा अनलाइन जुवा खेल्ने खेलाउने ७४ जनालाई प्रहरीले पक्राउ गरेको छ ।
बौद्धस्थित प्लटिङनजिकै सञ्चालित रेस्टुरेन्टमा अनलाइन बिङ्गो खेलिरहेको अवस्थामा उनीहरू पक्राउ परेको महानगरीय प्रहरी परिसर काठमाडौंले जनाएको छ ।
दोलखा स्थायी घर भइ बानेश्वर बस्ने ३० वर्षीय सुभास घिसिङले सञ्चालन गरेको उक्त रेस्टुरेन्टबाट आइतबार साँझ ६६ जना पुरुष र ८ जना महिलालाई नियन्त्रणमा लिइएको छ ।
६ लाख १९ हजार २ सय ५० रुपैयाँ पनि बरामद भएको छ । जुवा खेल्न वा सट्टाबाजी गर्न नहुने कसुरमा अनुसन्धान भइरहेको काठमाडौं प्रहरी परिसरका प्रवक्ता दिनेश मैनालीले जानकारी दिए ।