काठमाडौं – सत्तारुढ गठबन्धनको उच्चस्तरीय राजनीतिक समन्वय समितिको बैठकमा राष्ट्रिय सभाको निर्वाचनबारे छलफल भएको छ । माघ १२ गते हुने राष्ट्रियसभा निर्वाचनमा पाँच दलीय गठबन्धनका साझा उम्मेदवारलाई जिताउने सन्दर्भमा छलफल केन्द्रित भएको सञ्चारमन्त्री ज्ञानेन्द्र कार्कीले जानकारी दिए ।

मन्त्री कार्कीले राष्ट्रियसभा निर्वाचनको निम्ति गठबन्धनले समिति बनाएको र समितिले काम सुचारु गर्ने बताए । सातै प्रदेशमा काँग्रेसले समन्वय गर्ने गरी समिति बनाइएको समितिको बैठकमा सहभागी दुर्गा पौडेलले जानकारी दिइन् ।

उनले भने, ‘सबै प्रदेशमा काँग्रेसले समन्वय गर्ने गरी समिति बनाइएको छ । समितिमा पाँच दलबाट सम्बन्धित प्रदेशका नेताहरुलाई राखिनेछ । उहाँले राष्ट्रियसभाका उम्मेदवारलाई जिताउन समन्वय गर्नुहुनेछ ।’ काँग्रेस, माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाबीच राष्ट्रियसभामा तालमेल भएको छ ।

आगामी १२ गते निर्वाचन हुने राष्ट्रियसभा १९ सिट जित्ने गठबन्धनको तयारी छ । त्यहीअनुसार सबै सिटमा जित निकाल्न काँग्रेसका वरिष्ठ नेता रामचन्द्र पौडेल नेतृत्वको समिति घनिभूत छलफलमा छ ।