काठमाडौं – एएफसी महिला एसियन कप–२०२२ पहिलो छनोट खेलमा नेपालले आज फिलिपिन्सको सामना गर्दैछ। विश्व वरियतामा नेपालभन्दा माथि रहेको फिलिपिन्सविरुद्ध जित निकाल्ने लक्ष्यसहित नेपाली महिला टोली मैदान उत्रिने तयारीमा छ।

फिलिपन्ससँगको खेलका लागि नेपाली टोली गत सोमबार नै उज्वेकिस्तान गएको थियो। उज्वेकिस्तानको जेएआर स्टेडियममा नेपाली समयअनुसार दिउँसो पौने ४ बजे खेल सुरु हुनेछ। ‘एफ’ मा रहेको नेपालको समूहमा फिलिपिन्स र हङकङ छन्।

नेपालले अर्को खेल असोज ५ गते हङकङको सामना गर्नेछ। यस समूहको फिलिपिन्स र हङकङबीचको खेल असोज ८ गते हुनेछ। समूहको शीर्ष टोलीले अर्को वर्ष भारतमा हुने एसियन कप खेल्नेछ। एसियन कप जनवरी २० देखि फेब्रुअरी ६ सम्म हुनेछ।

छनोटअघि नेपालले घरेलु मैदानमा बंगलादेशविरुद्ध मैत्रीपूर्ण फुटबल खेलेको थियो। बंगलादेशसँग दुई खेल खेलेको महिला टोलीले एकमा जित र एकमा बराबरी नतिजा निकालेको थियो।