काठमाडौं – संविधानसभा सदस्य तथा नेकपा एमाले बागमती प्रदेशका संगठन विभाग प्रमुख अनन्त पौडेलले कोरोना महामारीको कहरका बेला हेलिकप्टरहरुले बढी भाडा असुलेको भन्दै सम्बन्धित निकायको ध्यानाकर्षण गराएका छन् ।

नेता पौडेलले कोरोना महामारीमा विभिन्न कम्पनीहरुका हेलिकोप्टरले सामाजिक दायित्वको ख्याल नगरी बढी भाडा असुलेको भन्दै सम्बन्धित मन्त्रालय र मन्त्रीहरुलाई ध्यानाकर्षण गराएका हुन् ।

नेता पौडेलले अन्य समयमा हेटौंडा–काठमाण्डौं हेलिकोप्टर चार्टर्ड भाडा १ लाख २५ हजार रहेको भए पनि हाल हेलिकोप्टर कम्पनीहरुले २ लाख ८० हजार लिएकोमा चिन्ता व्यक्त गरे ।

कोरोना संक्रमितहरुको आकस्मिक उपचारको लागि काठमाडौं जानुपर्ने वाध्यात्मक परिस्थितिको फाइदा उठाउँदै ती कम्पनीहरुले मानवीय संवेदनाहीन आपराधिक लुट मच्याएको उनको भनाइ छ।

उनले यस्ता अमानवीय कार्यको नियन्त्रण र नियमन गर्ने निकाय नागरिक उड्डयन प्राधिकरणले शिघ्र अनुगमनको काम थाल्नुपर्ने माग गरेका छन् ।

‘सामान्य बेला विलासिताको कोटीमा पर्ने यस्ता साधनहरु जसको उपभोग सामान्य परिवारले गर्न सक्दैनन् । तर, संकटका बेलामा सो साधन अति आवश्यक साधनमा परिवर्तित हुने भएकाले यसलाई व्यापारको रुपमा हेर्न हुँदैन ।’ उनले भने ।