आयरल्याण्डका एकजना १३ वर्षीय बालकसँग हवाइ यात्राका दौरान एउटा दुर्घटना भएको थियो । उक्त घटनालाई लिएर उनको आमाले एअरलाइन्समाथि मुद्दा दायर गरेकी थिइन् । चार वर्ष पछि  अदालतले उनलाई क्षतिपूर्ति बापत् ठूलो धनराशी प्रदान गर्न आदेश दिएको छ ।

आयरल्याण्डका ती १३ वर्षीय बालक एमरे कराक्या हवाई जहाजबाट डब्लिनबाट इस्तानबुल जाने क्रममा उक्त दूर्घटना घटेको थियो ।  उनको खुट्टामा क्याबिन क्रुको एक सदस्यले उम्लिरहेको चिया खसालेकी थिइन् । लामो उपचारपछि पनि उनको खुट्टामा दाग बसेको थियो ।

चार वर्ष अघिको उक्त घटनामा एमरे एकदमै डराएका थिए । उनको आमाले   टर्किश एयरलाइन्समाथि मुद्दा दायर गरिन् । आमाका अनुसार  दुर्घटनापछि उनको छोराले ठुलो शारीरिक तथा मानसिक कष्ट भोग्नुपर्यो । उनले अदालतलाई एमरेको खुट्टा चियाले एकदमै नराम्रो पोलेको तथा घाउ ठीक हुन चार हप्ताको समय लागेको बताइन् । उपचारपछि  पनि उनको खुट्टामा दाग नगएको उनको भनाइ छ ।

एमरेकी आमाका अनुसार उनको छोराको अवस्था यति गम्भिर थियो कि उपचारका लागि प्लास्टिक तथा ‘रिकन्स्ट्रक्टिभ सर्जन’ कहाँ लिएर जानु परेको थियो ।

यस  मुद्दामा फैसला सुनाउँदै  न्यायधीशले टर्किश एयरलाइंसलाई  ५६ हजार पाउण्ड (झण्डै एक करोड नेपाली रुपैयाँ ) क्षतिपूर्ति दिनुपर्ने आदेश दिएको छ ।