एजेन्सी – चीन सरकारले चीनभित्र नै बनेका कम्तीमा पनि १६ वटा खोप परीक्षण गर्न अनुमति दिएको बताइएको छ।

चीनको नेशनल मेडिकल प्रोडक्स एड्मिनिस्ट्रेसनले सो कुराको जानकारी दिएको हो। शनिबार सो निकायले दिएको जानकारीअनुसार चीन सरकारले यहाँका १६ वटा कम्पनीका खोपहरूलाई परीक्षणको अनुमति दिएको छ भने तीमध्ये ६ वटाको त परीक्षणको तीन चरण नै भइसकेको जनाइएको छ।

यी मध्येका दुई वटा कम्पनीले निर्माण गरेका खोपले भने चीनभित्र र बाहिर पनि बजार लिएको बताइएको छ। चाइना नेशनल बायोटेक ग्रुपको तर्फबाट बनेको सिनोफार्मको खोपले अहिले बजार लिएको छ। त्यस्तै गरी सिनोभ्याक बायोटेकले बनाएको कोरोना भ्याक भ्याक्सिनले पनि बजारमा प्रवेश पाएको छ र यसको धेरै तिर प्रयोग पनि भएको बताइएको छ।

ती दुई खोपले चीनको सरकारी आधिकारिक निकायबाट गएको डिसेम्बर ३० मा र यसै वर्षको फेब्रुअरी ५ मा नै अनुमति पाएका बताइएको थियो। त्यसैगरी चीनको औषधि व्यवस्थापन सम्बन्धी सरकारी निकायले यही फेब्रुअरीको ९ तारिखमा चार करोडभन्दा बढी खोप यहाँका औषधिको प्रचलन गर्ने संस्थाहरूलाई हस्तान्तरण गरेर लगाइएको पनि बताइएको छ।

त्यसमार्फत ती खोपहरू चीनमा काम गर्ने र भाइरसको जोखिम रहेका समुदायका नागरिकलाई नै लगाइएको बताइएको छ। ती खोपहरू भने अरू कतिपय देशमा निर्यात पनि गरिएको बताइएको छ।