पोखरा – टाइगर कप आमन्त्रित राष्ट्रिय महिला तथा पुरुष क्लब च्याम्पियनसिप भलिबल प्रतियोगितामा पुरुषतर्फ सशस्त्र प्रहरीको एपीएफ क्बल र गण्डकी प्रदेशले खेलमा जित हासिल गरेको छ ।
पोखरा रंगशालमा जारी बुधबारको खेलमा पुरुषतर्फ एपिएफले नेपाल पुलिस क्लबलाई ३–२ को सेटमा र गण्डकी प्रदेशले नेपाली सेनाको आर्मी क्लबलाई ३–१ ले पराजित गरेको हो ।
टाइगर ग्रुप पोखराको आयोजनामा सञ्चालित प्रतियोगिता अन्तर्गत पुरुषको दोस्रो खेलमा शसस्त्र प्रहरीले जित निकाल्नका लागि पाँचै सेट खेल्न परेको थियो । पहिलो दुई सेट लिएर जित्ने लक्ष्य बुनेको शसस्त्रले तेस्रो र चौथो सेट गुमाएपछि खेल निर्णायक सेटमा पुगेको थियो ।
पहिलो सेट २७–२५ मा लिएको शसस्त्रले दोस्रो सेट २५–२० मा लिएर २–० को अग्रता लिएको थियो । तेस्रो सेट जितेर सोझो सेटको नजिता निकाल्ने योजनालाई नेपाल पुलिस क्लबले रोकिदियो । तेस्रो सेट नेपाल पुलिस क्लबले सशस्त्रलाई २५–१९ मा पन्छाउँदै खेलमा फर्किएको थियो ।
चौथो सेट भने पुलिसलाई निकै सहज भयो । २५–९ मै हारपछि शसस्त्रले जित निकाल्न अन्तिम सेटसम्म कुर्नुपर्यो । अन्तिम तथा निर्णायक सेट भने १५–१० ले आफनो पक्षमा पार्दै शसस्त्रले जित हासिल गर्यो ।
बुधबार भएको पहिलो खेलमा नेपाल आर्मी विरुद्ध पुनरागमन गरेको गण्डकी प्रदेशले च्याम्पियनसिपमा ३–१ सेटको जित आत्मसात गर्दै तीन अंक जोडेको छ । गण्डकीले २२–२५, २५–१४, २५–१८ र २५–१७ सेटमा आर्मी सगँ खेलको नजिता आफ्नो पक्षमा पारेको छ । महिला तर्फ एक खेल मात्रै सम्पन्न भएको छ ।