काठमाडौं – प्रधानमन्त्री केपी शर्मा ओलीले नेकपाका अध्यक्ष पुष्पकमल दाहाल ‘प्रचण्ड’ र माधवकुमार नेपाललाई दशा लागेको बताएका छन् ।

बिहीबार आफ्नो समूहनिकट जिफन्टले आयोजना गरेको कार्यक्रममा बोल्दै उनले प्रचण्ड अधीर रहेको टिप्पणी गरे । कार्यक्रममा बोल्दै उनले प्रचण्डले निर्वाचन जित्न कठिन रहेको बताए ।

“हेर दशा लागेको, अब उहाँहरूले चुनाव जित्नुहुन्छ ? २०७४ मा हामीले चुनाव जिताएका थियौँ, चितवनबाट । त्योभन्दा अगाडि बत्ती निभाएर बाकस साटेर चुनाव जिताइएको थियो,” उनले भने ।

उनले प्रचण्डको प्रवृत्ति ‘फ्लोटिङ’ हुने रहेको पनि औँल्याए । “कहिले रोल्पाबाट, कहिले कताबाट, कहिले चितवनबाट चुनाव लड्नहुन्छ ! अब कताबाट हो ?,” उनको टिप्पणी थियो ।

उनले प्रचण्डलाई समाजवाद आइसकेको पनि कटाक्ष गरे । प्रचण्डलाई मात्रै नभएर उनका घरधनीलाई समेत समाजवाद आइसकेको टिप्पणी गरे । प्रचण्डले आफ्ना नातागोतालाई मात्रै पोसेको आरोप उनले लगाए । “उहाँहरुलाई समाजवाद आइसकेको छ, समाजवाद ल्याउने त भन्ने मात्रै हो,” उनको कटाक्ष थियो । -बाह्रखरी