जुम्ला -जुम्लाको सिंजा क्षेत्रका ३ पालिकाका नागरिकलाई लक्षित गरि सिंजा गाउँपालिकाको नराकोटमा नापी र मालपोत कार्यालय उद्घाटन गरिएको छ ।
कार्यालय उद्घाटनसँगै अब सिंजावासीलाई नापी र मालपोत सेवाका लागि महंगो खर्च व्यहोरेर सदरमुकाम धाउनुपर्ने बाध्य अन्त्य भएको छ । सिंजा क्षेत्रका हिमा, सिंजा र कनकासुन्दरी गाउँपालिकाका नागरिककलाई घर आँगनमै सेवा प्रवाह गर्ने गरि नराकोटबाट नापी र मालपोत कार्यालय उद्घाटन गरि सेवा सुरु गरिएको हो ।
भुमि व्यवस्था सहकारी तथा गरिबी निवारण मन्त्री बलराम अधिकारीले शुक्रबार नराकोटमा स्थापना गरिएको नापी र मालपोत कार्यालयको उद्घाटन गरेका छन् । नापी र मालपोत कार्यालय उद्घाटन गर्न जुम्ला पुगेका मन्त्री सहितको टोलीलाई सिंजाबासी पन्चेबाजा सहित भव्य स्वागत समेत गरेका छन् । मालपोत र नापी कार्यालय स्थापना भएपछि सिंजाबासी उत्साहित भएका छन् ।
सिंजा–६ गोराका मोति दमाईले संघियताको उपहार स्वरुप सिंजा क्षेत्रका तीन पालिकाले नापी र मालपोत कार्यालय पाएको बताए । संघियता कार्यान्वयनको करिब ७ वर्षपछि सिंजा क्षेत्रका तीन पालिका लाभान्वित हुनेगरी सिंजामा मालपोत कार्यालय उद्घाटन भएको हो ।
सिंजामा नापी र मालपोत कार्यालय स्थापना गर्ने सरकारको निर्णयले ऐतिहासिक सिंजा क्षेत्रले आर्थिक र प्रशासनिक रुपमा ठूलो सफलता हात पारेको भुमि व्यवस्था सहकारी तथा गरिबी निवारण मन्त्री बलराम अधिकारीले बताए । उनका अनुसार कार्यालयको दिगो व्यवस्थापन तथा प्रभावकारी सेवा प्रवाहमा आबश्यक सहयोग गरिने छ ।
संघियता कार्यान्वयनपछि गाउँ गाउँमा सिंहदरबार आएपनि नापी र मालपोतको झन्झझटिलो सेवाले नागरिक असुन्तुष्ट थिए । जग्गा खरिद, नामसारी, राजिनामा लगायतका काम गर्न महंगो खर्च गरेर सदरमुकाम धाउनुपर्ने सिंजाबासीको बाध्यता थियो । हप्तादिन सम्म होटलबास बस्नुपर्ने आउजाउ, होटलबास, कागजात व्यवस्थापनमा न्युनतम १०÷१५ हजार रुपैया खर्च हुने गरेको छ ।
तर सिंजामा नापी र मालपोत उद्घाटन भएपछि सिंजा क्षेत्रका हिमा, सिंजा र कनकासुन्दरी गाउँपालिकाका नागरिक उत्साहित भएका हुन । अब समय र पैसा सबै बचत हुनेछ । सिंजाका तिलाचन्द्र चौलागाँईले अब सेवा लिन सदरमुकाम जाँदा लाग्ने खर्च, समय सबै जोगिने बताए । जग्गा नामसारि, राजिनामा गर्दा बुढापाकालाई हप्तौ दिनसम्म हुने दुख पनि अन्त्य हुने उनको भनाइ छ ।
अघिल्लो सरकार सकारात्मक रहेपनि मुख्य सचिवले कानुनी अड्चनका देखाएका कारण यो कामले पूर्णता पाउन सकेको थिएन । तर प्रधानमन्त्री केपी शर्मा ओली नेतृत्वको सरकारले सिंजाली जनताको आवाज सुनेको छ । खस भाषाको उद्गमस्थलका रूपमा प्रसिद्ध यस स्थानमा विकेन्द्रीकरणको अभ्यासले विकासको नयाँ युगको सुरुवात गरेको भन्दै जुम्लामा खुसीयाली मनाएका छन् । अब सिंजा क्षेत्रका ३ वटैै पालिकाका नागरिकले घरआँगनमै सेवा पाउने छन् । गत पुस ९ गतेको मन्त्री परिषदको निर्णयले सिंजामा नापी मालपोत स्थापना गर्न बाटो खुलेको थियो । करिब २१÷२२ पटकको पहल तथा प्रयासपछि मात्रै टुंगोमा पुगेको थियो ।