सुर्खेत – ‘हामी कामका लागि हरेक वर्ष भारत जान्थ्यौं । परदेशी भुमिमा कहिल्यै असुरक्षित महशुस भएन । तर यस वर्ष भारतबाट फर्किएको केहि दिनमै गाउँ नजिकै मेरो श्रीमानको हत्या भयो’ पीडित निर्मला शाहीले भनिन्, ‘श्रीमानको हत्यापछि हामीलाई न्याय त कहाँ हो कहाँ । अदालतकै मिलेमतोमा उल्टै हत्यारालाई उन्मुक्ति दिने खेल भइरहेको छ ।’

जुनीचाँदे गाउँपालिका–६ मइप जाजरकोटकी निर्मला शाहीले गत माघ १८ गते श्रीमान रामबहादुर शाहीलाई गुमाएकि हुन् । मृतक शाही सहित निर्मला र उनका २ छोरा भारतबाट फर्किएको ३÷४ दिन मात्रै भएको थियो । त्यसैबेला माघ १७ गते जुनिचाँदे–५ स्थित शिवपुरी माध्यामिक विद्यालयमा राष्ट्रपती रनिङ शिल्ड प्रतियोगिता चलिरहेको रामबहादुरले सूचना पाए । घरपरिवारलाई जानकारी दिदै उनी उक्त प्रतियोगिता हेर्न भन्दै शिवपुरी पुगेका थिए । तर खेलकुद कार्यक्रम हेरेर फर्किने क्रममा रामबहादुरको हत्या भयो । मृतक रामबहादुर दाई लोकेन्द्र शाहीले हत्यापछि काहाँरे खोलामा भाई रामबहादुरको शव फालिएको दावी गरे ।

प्रहरीका अनुसार उनी खोलामा मृत अवस्थामा भेटिएका थिए । श्रीमानाको हत्यारालाई उन्म्ुक्ति दिन खोजिएको भन्दै कारवाहीको माग राख्दै निर्मला उच्च अदालत सुर्खेतको गेटमा सोमबारदेखि धर्ना बसेकी थिइन् । तर विबिहार अदालत अगाडी नै उनले आत्मदाहको प्रयास गरेपछि प्रहरीले नियन्त्रणमा लिएको छ । निर्मलासँगै उनकी बहिनीले पनि पेट्रोल छर्केर आगो लगाउने प्रयास गरेपछि प्रहरीले नियन्त्रणमा लिएको हो ।

जाजरकोट जिल्ला अदालतले रामबहादुरको कर्तव्य ज्यान मुद्दामा ४ जनालाई पूर्पपक्षका लागि कारागार पठाउन आदेश दिइ सकेको छ । तर बाँकी २ जनालाई धरौटी र २ जनालाई साधारण तारेकमा छाडेपछि निर्मलाले न्याय माग्दै उच्च अदालत अगाडी धर्नामा बसेकी हुन् ।

जिल्ला प्रहरी कार्यालय सुर्खेतका सूचना अधिकारी वीरेन्द्रविर विश्वकर्माका अनुसार निर्मला शान्तिपूर्ण रुपमा धर्नामा बसिराखेकि थिइन् । तर उनकी बहिनी शर्मिला शाहीले एक्कासी पेट्रोल ल्याएर छर्केर आत्मदाह गर्न खोजेपछि प्रहरीले नियन्त्रणमा लिएको उनले बताए ।
आगो लगाउन खोज्ने बहिनी शर्मिलालाई प्रहरीले नियन्त्रणमा लिएपछि धर्नामा बसेकी दिदीले आफूपनि प्रहरी कार्यालय जान्छु भनेपछि लिइएको बताइएको छ ।

रामबहादुर हत्याको अनुसन्धान प्रहरीले जारी राखेको छ । तत्कालिन समयमा उनको हत्याको खबरपछि इलाका प्रहरी कार्यालय गर्खाकोटबाट प्रहरी नायब निरीक्षक पूर्णबहादुर रानाको टोली घटनास्थल पुगेर घटनाको अनुसन्धान अगाडी बढाएको थियो ।

घटनास्थल थप शंकास्पद देखिएपछि जिल्ला प्रहरी कार्यालय जाजरकोटबाट प्रहरी निरीक्षक दिनेश तिमिल्सिनाको कमान्डमा थप टोली खटिएको थियो । घटनास्थलमा रगतजस्तो देखिने रातो पदार्थ भेटिएको र उनको टाउको र कानमा चोट देखिएको प्रहरीले प्रारम्भीक अनुसन्धानको क्रममा बताइएको छ ।

अनुसन्धानको क्रममा रामबहादुरको हत्यामा संलग्न भएको आरोपमा जाजरकोट प्रहरीले ९ जनालाई पक्राउ गरेर उनीहरु विरुद्ध जाजरकोट जिल्ला अदालतमा मुद्दा दायर गरेको छ । प्रहरीले रामबहादुरको हत्यामा संलग्न भएको आरोपमा सोही ठाउँका तुलाकुमारी शाही, बीरबहादुर शाही, जयबहादुर शाही, प्रेमबहादुर शाही, रत्नबहादुर शाही, मैसरा शाही, रेशमबहादुर शाही, रामबहादुर शाही र मैप १ नाबालकलाई पक्राउ गरेको थियो ।

जाजरकोट प्रहरीले उनीहरु विरुद्ध फागन ११ गते अदालतमा कर्तव्य ज्यान मुद्दा दर्ता गराएको हो । अदालतले फागुन १३ गते थुनछेक बहसपछि पाँच जनालाई धरौटी र चार जनालाई कारागार चलान गरिसकेको छ । २ लाख ५० हजारमा रत्न र १ लाख मैसराबाट धरौटी रकम माग गरेर अदालतले उनीहरुलाई छोडन आदेश दिएको जाजरकोट जिल्ला अदालतका सूचना अधिकारी रामसिंह ठकुरीले जानकारी दिए । उनकानुसार साधारण धरौटीमा रेशम, राम र मैप १ नाबालकलाई अदालतले छाड्ने आदेश दिएको थियो ।

थुनछेक बहसपछि पूर्पपक्षका लागि तुलाकुमारी, बीरबहादुर, जयबहादुर र प्रेमबहादुरलाई कारागार चलान गर्ने आदेश भएको सूचना अधिकारी ठकुरीको भनाइ छ । उनकाअनुसार मुद्दा अहिले पनि अदालतमा चलिरहेको छ । तर मृतक रामबहादुरकी श्रीमती निर्मलाले धरौटीमा छुटेकी मैसरा नै मुख्य दोषि रहेको दावी गर्दै आएकी छन् । धरौटिमा अदालतले छाडेकोमा चित्त नबुझेको

भन्दै छुटेकाहरुलाई थुनामा पठाइ पाउँ भन्दै उच्च अदालतमा निवेदन दर्ता गराएकी छन् ।
निर्मलाले विभिन्न ८ बुदे माग राख्दै उच्च अदालत अगाडी धर्ना बसेकी हुन् । जिल्ला अदालतको आदेश चित्त नबुझेपछि धरौटी छुटेकाहरुलाई थुनामा राखी पाउँ भनेर दिएर ७३ नम्बर अन्तरगत मुद्दा अहिले उच्च अदालतमा विचाराधिन छ ।

उच्च अदालत सुर्खेतका प्रवक्ता प्रेमप्रकाश थापाका अनुसार निर्मलाले दिएको निवेदन कानुनी प्रक्रियामा छ । जिल्ला अदालतबाट कैफियत माग भइसकेकाले प्रक्रियागतमा गइसकेको उनले बताए । दुवै पक्षलाई जानकारी दिनुपर्ने अदालती प्रक्रियाका कारण पेशी तोकेर थप प्रक्रिया अघि बढने उनले जानकारी दिए ।