काठमाडौं – नेकपा एकता राष्ट्रिय अभियानका संयोजक वामदेव गौतम पार्टीबाट निष्कासित भएका छन् ।
पार्टीमा आबद्ध समाजवादी केन्द्र नेपाल, आधुनिक नेपाल समाजवादी पार्टी, नेकपा ९राष्ट्रवादी० र आम नेपाली पार्टीका अध्यक्षहरूले गौतमलाई निष्कासन गरेको नेता युवराज सफलले जानकारी दिए ।
“एमालेमा ओलीजीले पेलेजस्तो उहाँले पनि पेल्नुभयो । हामी एकपटक छलफल गरौँ भन्दा हतारहतार पदको बार्गेनिङ गर्न जाने र उहाँहरूको पूर्वएकता टिमलाई नै कमिटीमा राख्ने व्यवहार गर्नुभयो । एकपटक बसेर छलफल गरौँ भन्दा उहाँले अहिले भेट्दिनँ भन्नुभयो । वरीयता निर्धारण गर्नु भएन । त्यसपछि आज हामीले उहाँलाई निष्कासन गर्ने निर्णय गर्यौँ,” उनले भने ।
शनिबार राजधानीको एक पार्टी प्यालेसमा बसेको उक्त चार पार्टीको शीर्ष नेताको बैठकले गौतमलाई निष्कासन गरी सफलको संयोजकत्वमा सचिवालय समिति गठन गरिएको छ ।
११ सदस्यीय सचिवालयमा कृष्णगोपाल बञ्जरा, मीननाथ देवकोटा, नीलकण्ठ पौडेल, द्वारिका निरौला मानव, गुणबहादुर बञ्जरा, भरत कुमाल, भगवती ढकाल, सरस्वती न्यौपाने, तेजबहादुर कार्की र रोशन लामिछाने रहेका छन् । उनीहरूले गौतमलाई पाँचबुँदे आरोप लगाएका छन् ।
गौतमले यही असार १४ गते काठमाडौंको रिपोर्टर्स क्लबमा पत्रकार सम्मेलन गरेर पार्टी घोषणा गरेका थिए । उनी चार दिनमै पार्टीबाट निष्कासित भएका हुन् ।