काठमाडौं – बेलायतले युक्रेनलाई ४ सय मिलियन डलर आर्थिक सहयोग गर्ने घोषणा गरेको छ ।
बेलायती प्रधानमन्त्री बोरिस जोन्सनले रुस र युक्रेनबीच जारी युद्धमा युक्रेनलाई सघाउन ४ सय मिलियन अमेरिकी डलरको सहयोग र सैन्य सामाग्री दिने घोषणा गरेका हुन् । युद्ध उपकरणलगायत नाइट भिजन उपकरणहरु रहेका छन । बेलायती संसदमा सम्बोधन गर्दै प्रधानमन्त्री जोन्सनले युक्रेनका लागि आफ्नो मुलुकले गर्ने सहयोग फलदायी हुने विश्वास समेत व्यक्त गरेका छन ।
यो सहयोग युक्रेनको भावी पुस्ताका लागि स्मरणीय रहने प्रतिक्रिया प्रधानमन्त्री जोन्सनले दिएका छन । साथै जोन्सनले युक्रेनका विभिन्न शहरमा फसेकाहरुको उद्धारका लागि ल्याण्डक्रुजर युक्रेन पठाउने पनि बताएका छन।
यता अमेरिका र जर्मनीले पनि युक्रेनलाई गरिएको सहयोगलाई निरन्तरता दिने जनाएका छन। यसैबीच युक्रेनको ओडेसा शहरमा रुसी सेनाको रकेट आक्रमणमा परेर एक बालकको मृत्यु भएको छ भने एकजना घाइते भएका छन । रकेट आक्रमणमा सो क्षेत्रका केही भवनमा क्षति समेत पुगेको छ ।
यता युक्रेनको मारियुपोल शहरबाट उद्धार गरिएकामध्ये सयौं छिमेकी मुलुक स्लोभाकिया पुगेका छन ।