काठमाडौं – गायक दुर्गेश थापाको गीत फेरि विवादमा तानिएको छ । महिलालाई पैसासँग तुलना गरिएपछि गीतको आलोचना भएको हो । यसबारे वैज्ञानिक समाजवादी महिला सङ्गठनले गीत प्रसारण बन्द गर्न आग्रह गरेको छ ।

सङ्गठनले आज विज्ञप्ति जारी थापाको ‘पैसा’ नामक म्युजिक भिडियोमा सभ्य समाजमा पाच्य नहुने खालका शब्दहरू प्रयोग भएको जनाउँदै गीत प्रसारण बन्द गर्न सम्बन्धित संस्था र राज्यका निकायलाई अनुरोध गरेको हो ।

“कलाकारले प्रयोग गर्ने शब्द, वेषभूषा र प्रस्तुतिले समाजमा अल्पकालीन र दीर्घकालीन असर पार्दछ, नेपाली समाजमा महिलामाथि हुने बलात्कारजन्य हिंसा, मानसिक र शारीरिक रूपमा हुने हिंसा वृद्धिमा सिनेमा, साहित्य र गीतमा महिलाको गरिमा र अस्तित्वलाई सस्तो र महिलाद्वेषी प्रस्तुत पनि एक कारण हो”, विज्ञप्तिमा भनिएको छ । थापाको गीत यसअघि पनि पटकपटक विवादमा तानिँदै आएको थियो ।