काठमाडौं – घरेलु मैदानमा आर्सनलले सनडरल्यान्डलाई ५-१ को फराकिलो अन्तरले पराजित गर्दै लिग कपको सेमिफाइनलमा स्थान बनाएको छ। एडि एनकेटियाले ह्याट्रिक गरेपछि आर्सनलले अन्तिम चारमा सहज रुपमा स्थान बनाएको हो।

सुरुवातबाटै उत्कृष्ट प्रदर्शन गरेको आर्सनलले खेलमा अग्रता भने एनकेटियाको गोलमार्फत १७ औ मिनेटमानै लिएको थियो। घरेलु टोलीका लागि २७ औ मिनेटमा निकोलस पेपेले अग्रता दोब्बर बनाए। तर सनडरल्यान्डले पहिलो हाफमा खेलमा फर्कने प्रयास गर्दै ३१ औ मिनेटमा गोल गर्यो। सन्डरल्यान्डका लागि ब्रोडहेडले गोल गरेका थिए।

पहिलो हाफमा २-१ को अग्रता बनाएको आर्सनल दोस्रो हाफमा थप आक्रमक देखिएको थियो। ४९ औ मिनेटमा आर्सनलले तेस्रो गोल गर्‍यो। आर्सनलका लागि एनकेटियाले ब्यक्तिगत दोस्रो गोल गर्दै टीमलाई ३-१ को अबस्थामा पुर्‍याए। उनले नै ५८ औ मिनेटमा पेपेको पासमा ह्याट्रिक पुरा गरे। आर्सनलका लागि पाँचौं गोल भने पाटीनोले अतिरिक्त समयमा संभव बनाए।​

लिगकपको सेमिफाइनल प्रवेशका लागि बुधबार राति टोटेनह्यामले वेस्टह्याम ब्रेन्टफोर्डले चेल्सी तथा लिभरपुले लेस्टरको सामना गर्दै छन्।