बराबरीमा रोकियो रियल

एजेन्सी –  रियल म्याड्रिड ओसासुनासँग खेल्दै गोलअन्तरको आधारमा स्पेनिस ला लिगको शीर्ष स्थानमा उक्लिएको छ । कार्लो एन्चेलोटीको टोलीसँगै सेभिया, रियल बेटिस र रियल सोसिडाडको समान २१ अङ्क रहेको छ ।

छैटौँ स्थानमा रहेको ओसासुना शीर्ष स्थानको टोलीभन्दा मात्र २ अंकले पछि रहेको छ । खेलमा ओसासुनाका जोन मोनकायोलाको प्रहार पोष्टमा लागेको थियो । उता, खेलमा रियलले गोलका धेरै अवसर सिर्जना गरेको थियो । करिम बेन्जेमाको दुईवटै प्रहार गोलमा परिणत हुन सकेन भने कासिमेरो पनि लङ रेञ्ज प्रहारबाट गोल नजिक पुगेका थिए ।

स्यान्टियागो बर्नेबाउमा ओसासुनाले सन् २००५ पछि पहिलोपटक अङ्क बटुल्न सफल रह्यो । यसअघि रियलले आफ्नो घरेलु मैदानमा लगातार ११ पटक जित हासिल गरेको थियो । बुधबार राति भएका अन्य खेलमा बार्सिलोना रायो भायोकानोसँग १–० ले पराजित भयो भने सेभिया मायोर्कासँग १–१ को बराबरीमा रोकियो । रियल बेटिसले भ्यालेन्सियालाई ४–१ ले हरायो ।