सुर्खेत – नेपाली काँग्रेसको १४ औँ महाधिवेशनका लागि  आज देखि वडा तहको अधिवेशन सुरु हुँदैछ । १० वटा जिल्ला रहेको कर्णालीका ८ जिल्लाका वडा तहमा अधिवेशन सुरु हुने भएको छ। सुर्खेत र डोल्पामा सदस्यता विवादका कारण अधिवेशन अनिश्चित बनेको काँग्रेस स्रोतको भनाई छ ।

केन्द्रीय कार्यतालिका अनुसार यही भदौ २३ गतेसम्म वडा अधिवेशन गरिसक्नुपर्ने कार्यतालिका छ । कार्यतालिका अनुसार कर्णालीका दैलेख, जाजरकोट, मुगु, जुम्ला, हुम्लामा अहिले ११ बजेदेखि वडा अधिवेशन सुरु भएको छ । यी जिल्लाका तीन सय १८ वटा वडाको अधिवेशन आज नै सम्पन्न हुनेछ । सल्यानमा २१ गते, कालिकोटमा २२ र रुकुम पश्चिममा २३ गते वडा अधिवेशन गरिने छ ।

सल्यानमा ८३, कालिकोटमा ८६ र रुकुमपश्चिममा ७३ वटा वडातह रहेका छन् । कालिकोटमा निर्वाचन अधिकृत पुग्न ढिलाई भएकाले २२ गते सार्ने निर्णय गरिएको कालिकोटका युवा नेता दमन शाहीले जानकारी गराए ।
यस्तै सुर्खेतका ९९ वडामा पनि २२ गते अधिवेशन गरिने सुर्खेत जिल्ला सभापति कमलराज रेग्मीले जानकारी दिए ।

काँग्रेस नेता जीवनबहादुर शाहीले कर्णालीका अधिकांश ठाउँमा आजदेखि वडा तहको अधिवेशन सुरु भएको जानकारी दिए ।