सुर्खेत – कर्णाली प्रदेशको राजधानी सुर्खेतमा कोरोनाको जोखिम पुनः बढ्न थालेपछि सर्वसाधारणलाई मास्क अनिवार्य गरी गरिएको छ ।

जिल्ला प्रशासन कार्यालय, स्वास्थ्य सेवा निर्देशनालय, जिल्ला जनस्वास्थ्य कार्यालय र सुर्खेत उद्योग वाणिज्य संघलगायतले वीरेन्द्रनगर बजारका सर्वसाधारणलाई मास्क लगाउन अनिवार्य गर्दै ‘तपाइँको मास्क खोइ’ अभियान सञ्चालन गरेको छ । प्रमुख जिल्ला अधिकारी छविलाल रिजालको नेतृत्वमा मास्क अनिवार्य अभियान चलाइएको हो । कोभिडको दोस्रो चरणमा बिरामीको संख्या केही कम भएपछि निषेधाज्ञा खुल्ला गरिएको थियो । निषेधाज्ञा खुकुलो भएसंगै सर्वसाधारणले बिना माक्स हिड्डुल गर्न थाले पछि जोखिम बढ्न सक्ने भन्दै मास्क अभियान थालिएको जिल्ला प्रसाशन कार्यालय सुर्खेतले जनाएको छ ।
सर्वसाधारणहरूले मास्क लगाउन अटेर गरेको, भीडभाड बढी गर्ने गरेको पाइए पछि माक्स अभियान संचालन गरीएको प्रमुख जिल्ला अधिकारी छविलाल रिजालले जानकारी दिए ।
प्रजिअ रिजालका अनुसार कोरोनाको तेस्रो चरणको जोखिम बढ्न थालेपछि मास्क लगाउन आग्रह गर्नुपरेको हो । नागरिकले मास्क लगाउन अटेर गरेको पाइएको हुँदा पुनः सबैले मास्क लगाउन, भीडभाड नगर्न प्रसाशनले आग्रह गरेको छ ।
‘केही दिन नागरिकहरूलाइ सचेतना फैलाउछौं, अनिवार्य मास्क लगाउनुहोस् र स्वास्थ्यका मापदण्ड पालना गर्नुस् भनेर टोली बनाएर बजारमा अनुगमनलाइ तिव्रता दिएका छौं,’ रिजालले भने, ‘यति गर्दा पनि व्यवसायी र नागरिकहरूले अटेरी गरे संक्रमण रोक्न फेरि निषेधाज्ञा गर्नु पर्ने अन्तिम विकल्पमा जान बाध्य हुनेछौं ।’
सुर्खेतमा कोभिडको संक्रमण दर साउन दोस्रो सातापछि बढेको छ । साउनको पहिलो सातासम्म २० प्रतिशत रहेको सक्रमण दर दोस्रो सातामा आइपुग्दा ३० प्रतिशतभन्दा बढी भएको जिल्ला जनस्वास्थ्य सेवा कार्यालय सुर्खेतले जनाएको छ ।
वरिष्ठ जनस्वास्थ्य प्रशासक चेतननिधि वाग्लेले साउन पहिलो सातासम्म ओरालो लागेको सक्रमण दर दोस्रो सातापछि उकालो लागेको बताए । उनले साउन दोस्रो सातादेखि ३० प्रतिशतबाट माथि पुगिसकेको जानकारी दिँदै सोमबार करिब ५० प्रतिशत पुगेको उल्लेख गरे ।
कोरोनाको जोखिम पुनः बढेको हुँदा मास्कको प्रयोग अनिवार्य भएको, भीडभाड नगर्न आह्वान गर्नुपरेको उनको भनाइ छ । यदि समयमै सचेत हुन नसकेमा कोरोनाको तेस्रो लहरले पुनः क्षति बढाउने उनले उल्लेख गरे ।

कर्णालीको सुर्खेत जिल्ला कोरोनाबाट सबैभन्दा बढी प्रभावित छ । कोरोनाका कारण सुर्खेतका मात्रै २०७ जना सक्रमितको मृत्यु भइसकेको छ । हाल सुर्खेतमा सक्रिय संक्रमितको सख्या तीन सय पुग्न लागेको छ । दुई सयभन्दा बढी होम आइसोलेसनमा बसेका छन् । चाडपर्वसमेत नजिक आउन थालेपछि भीडभाड बढ्ने र कोरोनाको जोखिम झन भयावह हुने खतरा देखिएको वरिष्ठ प्रशासक वाग्लेले बताए । यसका साथै सुर्खेत उद्योग वाणिज्य संघले व्यापारी तथा व्यवसायीहरूलाई भीडभाड नगर्न आग्रह गर्दै सबैलाई मास्क प्रयोगमा अनिवार्य गरेको छ । सामान बिक्री गर्दा मास्क अनिवार्य लगाउन, पसलमा भीड नगर्न र मास्क नलगाएका ग्राहकलाई मास्क प्रयोग गर्न सुझाव दिइएको उद्योग वाणिज्य संघका महासचिव लक्ष्मण कँडेलल जानकारी दिए । सुर्खेतमा प्रशासनले बिहान ९ बजेदेखि बेलुका ६ बजेसम्म पसल खोल्न अनुमति दिएको छ । कोरोनाको जोखिम पुनः बढ्न थालेपछि समय निर्धारणलाई कडाइ गरिएको छ ।