काठमाडौं – पाकिस्तानी क्रिकेट टोलीका पूर्वकप्तान साहिद अफ्रिदीले नेपालमा क्रिकेट खेल्ने भएका छन्।
४६ वर्षीय अलराउण्डर अफ्रिदीले आगामी असोज ९ गतेदेखि काठमाडौँमा सञ्चालन हुने टी–२० एभरेष्ट प्रिमियर लिग (इपिएल) मा काठमाडौँ किंग्स–११ बाट खेल्ने तय भएको हो।
काठमाडौँ किंग्स–११ ले आज कार्यक्रमको आयोजना गरी पाकिस्तानी क्रिकेट टोलीका पूर्वकप्तान अफ्रिदीलाई आफ्नो टोलीमा अनुबन्ध गरेको जानकारी दिएको छ।
अफ्रिदीले पाकिस्तानका लागि २७ टेष्ट प्रतियोगिता, ३९८ एकदिवसीय तथा ९९ टी–२० क्रिकेट प्रतियोगिता खेलेका थिए। त्यस क्रममा उनले टेष्टमा एक हजार ७१६, एकदिवसीयमा आठ हजार ६४ तथा टी–२० मा एक हजार ४१६ रन बनाएका छन्। त्यस्तै उनले टेष्ट प्रतियोगितामा ४८, एकदिवसीयमा ३९५ तथा टी–२० मा ९८ विकेट लिएका छन्।
अलराउण्डर अफ्रिदीले पाकिस्तानका लागि सन् १९९६ देखि सन् २०१८ सम्म खेलेका थिए। अफ्रिदीले विश्वका अधिकांश फ्रेन्चाइज लिग खेलिसकेका छन्।
कीर्तिपुरस्थित त्रिवि क्रिकेट मैदानमा हुने तय भएको चौंथो संस्करणको इपिएलमा ६ टोलीको सहभागिता रहने आयोजक संस्थाले जनाएको छ।
गत वर्ष कोरोना भाइरस महामारीका कारण इपिएल हुन सकेको थिएन। इपिएलमा साविक विजेता ललितपुर प्याट्रियट्ससँगै काठमाडौँ किङ्स–११, पोखरा राइनोज, चितवन टाइगर्स, भैरहवा ग्ल्याडियटर्स र विराटनगर वारिवर्सले प्रतिस्पर्धा गर्ने छन्।