काठमाडौं । नेकपा एमालेबाट निष्कासित माधवकुमार नेपालले आफूपक्षीय जिल्ला पदाधिकारीहरूसँग आज छलफल गर्दैछन् । नेपालले यसअघि आफूनिकटका भ्रातृ संगठनका प्रमुख, केन्द्रीय सदस्यलगायतसँग छलफल गरिसकेका छन् ।

यसैक्रममा आज बिहान ११ बजेदेखि समानान्तर कमिटीमा रहेका जिल्लाका पदाधिकारीहरूसँग भर्चुअल रूपमा छलफल गर्न लागिएको हो । एमालेमा आन्तरिक विवाद चुलिरहँदा नयाँ पार्टी खोल्ने या संस्थापन पक्षसँगको संघर्षलाई जारी राख्नेबारे नेपाल पक्षमा दुई धार छ ।

केही नेताले एमालेमै रहेर प्रधानमन्त्री एवं अध्यक्ष केपी ओलीसँगको संघर्षलाई जारी राख्नुपर्ने बताउँदै आएका छन् भने केहीले नयाँ पार्टी खोलेर आफ्नो ढंगले अगाडि बढ्नुपर्ने दबाब दिइरहेका छन् । नेतृत्वसँग समन्वय नै नगरी एकताको नाममा व्यक्तिगत डिल गरिरहेको भन्दै योगेश भट्टराई, गोकर्ण विष्टलगायतका नेताहरूको पनि तीव्र आलोचना भइरहेको छ ।

केही दिनयता चरणवद्ध रूपमा गरिँदै आएको छलफलपछि प्राप्त सुझावको आधारमा अब कसरी प्रस्तुत हुने भन्ने रणनीति बनाउने नेपालको तयारी रहेको उनीनिकट एक नेताले बताए ।