सुर्खेत – कर्णाली प्रदेश अस्पतालले कोरोना संक्रमणपछि उपचारका क्रममा निधन भएकाहरुको शव तत्काल व्यवस्थापन गर्न सुरु गरेको छ ।

जेठ २ गते नेपालप्रेसमा समाचार प्रकाशित भएपछि दवावमा आएको अस्पताल प्रशासनले मृतकको शव कम्तिमा शवगृहमा राख्ने व्यवस्था गरेको छ ।

यसअघि मृतकको शव २१ घण्टासम्म शय्यामा रहँदा उपचाररत अन्य विरामी, कुरुवा र स्वास्थ्यकर्मीमा समेत त्रास उत्पन्न भएको थियो ।

‘हिजो म प्रदेश अस्पतालमा गएको थिए । सुरुमा नेपाली सेनाको व्यवस्थापन टोली नआएसम्म शय्यामै शव राख्ने गरिएकोमा शवगृहमा राख्न थालिएको पाएँ,’ कोभिड सेल्फ हेल्प समूह सुर्खेतका अभियान्ता धर्मराज आचार्यले भने । यसरी तत्काल शव हटाउँदा त्यहाँ रहेका अन्यलाई नकारात्मक असर कम हुने उनले बताए ।

यता, जिल्ला प्रशासन कार्यालय सुर्खेतका प्रमुख जिल्ला अधिकारी छवि रिजालले अस्पताल व्यवस्थापन समूह तथा अन्य सरोकारवाला निकायसँगको पहलमा उक्त कार्य सुरु गरिएको बताए ।

‘प्रदेशको सामाजिक विकास समितिले पनि यसबारेमा ध्यानाकर्षण गराएको थियो ।’ प्रजिअ रिजालले भने, ‘हामीले अहिलेलाई मृत्यु भएलगत्तै शव गृहमा राख्ने व्यवस्था मिलाएका छौं । यसबाट उपचार गराइरहेका नागरिकलाई मनोवैज्ञानिक असर नपर्नेमा हामी ढुक्क छौं ।’

#nepalpress