बाटो बिराएका अभिभावक महोदय !
तिमीलाई धूमपान गर्ने आदत रहेछ
सके त्यो कुलत छोड, सक्तैनौ भने
सन्तानलाई चुरोट किन्न खेतालो नपठाऊ !

तिमी मापसे र लापसेको सिकार भएका रहेछौ
सकेसम्म कोसिस गर त्यो कुलतबाट मुक्त होऊ
मुक्त नहुन्जेल आजैका मितिदेखि
नशाको प्रभावमा पत्नी र सन्तानलाई यातना नदेऊ !

बालकहरु अन्जान हुन्छन्,
गल्ती कुरा सिकाएर जिन्दगी नबिगारी देऊ !
राम्ररी खुट्टा टेक्न नजान्दै
रेलिङबिनाको बार्दलीमा पुर्‍याएर त्यसै नछोडिदेऊ !

तिमीलाई वनभोज जान मन लाग्यो भन्दैमा
बालकलाई पोखरीमा एक्लै खेल्न नछोडिदेऊ !
तिमी साँच्चै अभिभावक हौ भने
आफ्नोभन्दा बढी सन्तानको भविष्य सोचिदेऊ !