एजेन्सी । इटालियन सिरी ए क्लब एसी मिलान विजयी भएको छ । युरोपा लिग फुटबल अन्तर्गत बिहीबार राति भएको खेलमा मिलान सेल्टिकमाथि ३–१ ले विजयी भएको हो ।

सेल्टिकको घरेलु मैदानमा भएको खेलको १४ औं मिनेटमा मिलानले अग्रता लिएको थियो ।  मिलानका लागि रादे क्रुनिकले गोल गर्दै अग्रता दिलाएका थिए । पहिलो हाफ सकिन तीनमिनेट बाँकी रहँदा ब्राहिम डियाजले गोल गरे । उनले हेर्नान्डेजको पासमा गोल गर्दै मिलानलाई पहिलो हाफमा २–० को अग्रता दिलाए ।

७६ औं मिनेटमा सेल्टिकका मिडफिल्डर मोहमेद ल्योउनोउसीले गोल गर्दै घरेलु टोलीलाई खेलमा फर्काउने प्रयास गरे । उनले क्रिस्टिएको पासमा गोल गरेका थिए । तर, खेलको इन्जुरी समयमा जेन्स पेट्टेर हउगेले गोल गरे । उनले सेलेमेकर्सको पासमा गोल गर्दै एसी मिलानलाई ३–१ को जित दिलाए । यससँगै समूह जीमा रहेको मिलानले समूहको पहिलो खेलबाट तीन अंक् जोड्दै लिगमा सुखद सुरुवात गरेको छ ।

यसै समूहमा भएको अर्को खेलमा लिलेले स्पार्टा प्रागुएलाई पराजित गरेको छ । स्पार्टाको घरेलु मैदानमा भएको खेलमा दस खेलाडीमा समेटिएको घरेलु टालीमाथी लिलेले ४–१ को जित निकाल्दै समूूहमा तीन अंक जोडेको छ ।