काठमाडौं – प्रधानमन्त्री केपी शर्मा ओलीले पूर्वप्रधानमन्त्री बाबुराम भट्टराईले आफूसहित अन्य पूर्वप्रधानमन्त्रीमाथि लगाएको आरोपको खण्डन गरेका छन् ।

६५औं प्रहरी दिवसका अवसरका प्रहरी प्रधान कार्यालयमा आयोजित कार्यक्रममा प्रधानमन्त्री ओलीले भट्टराईको आरोपमा कुनै सत्यता नभएको बताएका हुन् ।

उनले गलत कुराको प्रचार गरिएको दावी गरेकाछन् । केही दिनअघि एक कार्यक्रममा भट्टराईले प्रधानमन्त्री केपी ओली र पूर्वप्रधानमन्त्रीहरु शेरबहादुर देउवा र पुष्पकमल दाहालले बूढीगण्डकी जलविद्युत् आयोजनाको नौ अर्ब रुपैयाँ भ्रष्टाचार गरेको प्रमाण आफूसँग रहेको बताएका थिए।

फरक प्रसंगमा प्रधानमन्त्री ओलीले बलात्कारविरुद्ध कडा कानुन ल्याउने तयारीमा रहेको पनि बताए।

उनले एसिडलगायत बलात्कार अपराधविरुद्ध कडा कानुन बनाउने विषयमा छलफल भइरहेको जानकारी दिए ईमेजखबरमा समाचार प्रकाशित छ ।

बलात्कारजस्ता जघन्य अपराधलाई समेत मिलापत्र गराउने कार्यप्रति कडा रुपमा प्रस्तुत हुन समेत प्रधानमन्त्री ओलीले प्रहरीलाई निर्देशन दिए।

कार्यक्रममा गृहमन्त्री रामबहादुर थापाले प्रहरीका कमजोरीको मात्रै प्रचार गर्ने गरेको भन्दै आक्रोश व्यक्त गरे

उनले सीमित स्रोत साधन भएपनि प्रहरीको कार्यसम्पादन उच्च रहेको बताए । हजारौं राम्रा कामहरुलाई नजरन्दाज गर्ने समाजले औंलामा गन्न मिल्ने कमजोरीको मात्रै प्रचार गरेको उनकाे तर्क छ ।

गृहमन्त्री थापाले प्रहरी आकर्षणको केन्द्र बनिरहेको दाबीसमेत गरे ।