पर्सा – साउन ५ मा साँझ ७ बजेतिर पर्साको वीरगञ्ज महानगरपालिका–२ छप्कैया घर भएकी ४ वर्षीया बालिका हराइन् । परिवारले दिएको सूचनाको आधारमा प्रहरी र गाउँले बालिकाको खोजीमा जुटे । साउन ७ मा विहान छप्कैयास्थित झाडीमा बालिकाको शव भेटिएको थियो ।

बालिकाको बलात्कारपछि हत्या भएको प्रहरीको प्रारम्भिक अनुसन्धान निष्कर्ष छ । बलात्कार र हत्यामा संलग्न ३ नाबालक र १ जना किशोरलाई पक्राउ गरिएको जिल्ला प्रहरी कार्यालय पर्साका प्रवक्ता (डिएसपी) प्रह्लाद कार्कीले  बताए ।

पक्राउ पर्नेमा वीरगञ्ज–२ घर भएका १७ वर्षीय सलमान खान उर्फ जफ्रुदिन, वीरगञ्ज महानगर–१६ घर भएका १९ वर्षीय सलमान खान, १२ वर्षका बालक र १६ वर्षका सैदुल्ला अन्सारी उर्फ करेल्हा छन् ।

साँझ घरबाट निस्केकी बालिकालाई १९ वर्षका सलमानले हात समातेर झाडीमा लान्छन् । वीरगञ्ज महानगरपालिका वडा नम्बर–२ छप्कैयास्थित खाली जग्गाको झाडीमा ४ जनाले पालैपालो बलात्कार गरेको अनुसन्धानमा संलग्न एकजना अधिकृतले  बताए ।

प्रारम्भिक अनुसन्धानबाट १२ वर्षीय बालक संलग्न रहेको खुलेपछि प्रहरी अरु ३ जनासम्म पुगेको थियो । बलात्कार गरेर हत्यापछि सैदुल्ला अन्सारी भारतको नयाँ दिल्ली भागेका थिए । भारतीय प्रहरीसँगको समन्वयमा उनलाई गाँजियाबादबाट पक्रेर नेपाल ल्याइएको छ ।

बलात्कारपछि इँटा प्रहार
बालिकालाई सामूहिक बलात्कार गरेपछि इँटा प्रहार गरेर हत्या गरेको प्रहरीको अनुसन्धानबाट थाहा भएको छ । बालिकाको दायाँ तर्फको गाला र टाउकोमा चोट छ । वीरगञ्जको विभिन्न ठाउँबाट पक्राउ गरिएका आरोपीहरुले ‘यौन प्यास मेट्न’ बलात्कार गरेको अनुसन्धान अधिकृतहरूले बताएका छन् ।

आरोपीहरुले पालै पालो बलात्कार गरेको स्वीकारेका छन् । मृतकको शव पोष्टमार्टम गरेर दाहसंस्कार गरिएको छ । आरोपीहरुविरुद्ध जबर्जस्ती करणी र ज्यानसम्बन्धी कसुरमा जिल्ला अदालतबाट म्याद लिएर प्रहरीले अनुसन्धान गरिरहेको छ ।