काठमाडौं – ग्लोबल आईएमई बैंक लिमिटेडले आफ्ना ग्राहकहरूलाई मोबाइल बैंकिङ्ग एप्लिकेसन चलाउन निःशुल्क मोबाइल डाटा उपलब्ध गराउने भएको छ ।
बैंकले ‘ग्लोबल स्मार्ट र ग्लोबल स्मार्टप्लस’ एप्लिकेसन चलाउन निःशुल्क मोबाइल डाटा उपलब्ध गराउने भएको हो।

डिजिटल बैंकिङ्गको क्षेत्रमा यो नयाँ पहल भएको बैंकले दाबी गरेको छ । उक्त सुविधा नेपाल टेलिकमको सिम भएका ग्राहकहरूलाई मात्र उपलब्ध हुनेछ ।

यो सुविधा प्रदान गर्ने उद्देश्यका साथ ग्लोबल आईएमई बैंक लिमिटेड र नेपाल टेलिकमबीच समझदारी पत्रमा मंगलबार हस्ताक्षर सम्पन्न भएको छ ।

समझदारी पत्रमा ग्लोबल आईएमई बैंक लिमिटेडको बजार तथा व्यवसाय प्रवर्द्धन प्रमुख शान्ता शिवाकोटी र नेपाल टेलिकमको तर्फबाट प्रमुख व्यापार अधिकृत संगीता पहाडीले हस्ताक्षर गरेका छन् ।

ग्लोबल आईएमई बैंकले सबै क्षेत्र र वर्गसम्म बैंकिङ्ग सेवाको पहुँच पुर्‍याउने उद्देश्यले ७६ जिल्लामा २८७ शाखा, २५२ एटीएम, २६३ शाखारहित बैंकिङ्ग सेवा, ४८ एक्सटेन्सन तथा राजश्व संकलन काउन्टर तथा तीन वटा वैदेशिक प्रतिनिधि कार्यालयसमेत गरी करिब ८५० सेवा केन्द्रबाट २७ लाखभन्दा बढी ग्राहकलाई सेवा प्रदान गरिरहेको छ ।